Fagráð - rannsóknir
Á Rannsóknarmiðstöð lífræns landbúnaðar í Frick í Sviss hefur m. a. verið unnið að rannsóknum í eplarækt síðan 1974 (ÓRD,2000) | Í kjölfar efnavæðingar landbúnaðar á seinni hluta 19. aldar og lengst af 20. öldina urðu rannsóknir í þágu lífræns landbúnaðar hornreka með fáum undantekningum. Hér á land voru unnar mjög gagnlegar rannsóknir á nýtingu búfjáráburðar og nýtingu belgjurta framan af síðustu öld en enn er lítið um rannsóknir hérlendis sem nýtast við eflingu lífræns landbúnaðar. Hæst ber belgjurtarannsóknir en margvísleg viðfangsefni bíða úrlausna. Erlendis hefur víða orðið stefnubreyting í vali rannsóknarverkefna í kjölfar lífrænu vakningarinnar og þess eru allmörg dæmi að tilraunastöðvar sérhæfist í rannsóknum í þágu lífræns búskapar. (sjá Ritaskrá , Tenglar ). Á fagráðstefnum erlendis kemur nú æ betur í ljós árangur nýrra rannsókna á þessum sviðum og er þekkingin að aukast. Sömuleiðis er kennsla á framhaldsskóla- og háskólastigum að aukast verulega. |
Fagráð í lífrænum búskap var stofnað 1997. Það er skipað fulltrúum lífrænna bænda, búnaðar - og garðyrkjuskóla, vottunarstofu, landbúnaðarráðuneytisins, Rannsóknastofnunar landbúnaðarins og Bændasamtaka íslands.
Fagráðið gerði samþykkt síðla árs 1998 um áherslusvið tilrauna og rannsókna í þágu lífræns landbúnaðar og forgangsraðaði þeim í ljósi hérlendra aðstæðna. Þar eru lífrænn áburður, belgjurtarækt og endurræktun túna efst á blaði.
Samþykkt Fagráðs í lífrænum búskap um áherslusvið og forgangsröðun tilrauna og rannsókna
Á 4. fundi Fagráðs í lífrænum búskap 27. nóvember 1998 var gerð eftirfarandi samþykkt um helstu áherslusvið tilrauna og rannsókna í þágu lífræns landbúnaðar og þeim forgangsraðað í ljósi hérlendra aðstæðna. Tekið skal fram að öll þessi svið eru veigamikil. Forgangsröðun í flokka A) B) og C) er fyrst og fremst hugsuð sem leiðbeining um áherslur, bæði fyrir þá sem vinna að athugunum, könnunum, tilraunum og rannsóknum sem varða lífrænan búskap með einum eða öðrum hætti, og fyrir þá sem annast veitingu fjármuna úr sjóðum til slíkra verkefna. Fagráð í lífrænum búskap er ætíð reiðubúið að gera nánari grein fyrir samþykkt þessari og vera einstaklingum, faghópum og stofnunum til ráðuneytis um efni sem hana varðar. Samþykktin skiptist í skrá yfir áherslusvið samkvæmt forgangsröðun og greinargerð um þau svið.
ÁHERSLUSVIÐ
A-flokkur
1) Lífrænn áburður, búfjáráburður o.fl., hráefni til áburðar- eða safnhaugagerðar, hvernig og á hvaða árstímum á að nota áburðinn þannig að hann nýtist sem best. Tekur til allrar lífrænnar ræktunar.
2) Belgjurtarækt fyrir tún, beitilönd, akurlendi og garðyrkju úti sem inni, þar með sáðskipti.
3) Endurræktun túna, þar með jarðvinnsla, áburðarnotkun, sáðskipti, belgjurtir o.fl.
B-flokkur
1) Hagrænar rannsóknir, bæði hagkvæmni búrekstrar á lífrænum býlum og markaðsmál sem snerta lífrænt vottaðar afurðir.
2) Fræðsla og upplýsingar, bæði til framleiðenda og neytenda, þar með aðferðir og tækni við miðlun.
C-flokkur
1) Nýting engja, einkum tækni við öflun heyja á votlendi.
2) Barátta gegn illgresi og sjúkdómum í nytjajurtum, bæði í inni- og útiræktun.
3) Sjúkdómavarnir og heilsuvernd búfjár, notkun óhefðbundinna lyfja o.fl.
4) Húsakostur á lífrænum býlum, einkum varðandi gripahús, húsagerð, innréttingar o.fl.
Skrá yfir ritgerðir sem varða lífrænan búskap og lagðar hafa verið fram til lokaprófs á framhalds- og háskólastigum hérlendis
Gunnþór K. Guðfinnsson (1992).
Lífræn ræktun. Aðalverkefni, Garðyrkjuskóli ríkisins, Reykjum í Ölfusi, 21 bls.
Svava Theodórsdóttir (1995).
Lífrænn landbúnaður. BS-ritgerð í rekstrarfræðum, Samvinnuháskólinn á Bifröst, 82 bls.
Raimund B. Brockmeyer-Urbschat (1995).
Lífrænn búskapur. Aðalritgerð (BS), Búvísindadeild, Bændaskólinn á Hvanneyri 77 bls.
Ása S. Harðardóttir (1997)
Lífrænir búskaparhættir á Íslandi. BS-ritgerð, Háskóli Íslands, Raunvísindadeild, Jarð- og landfræðiskor, 72 bls.
Kári Friðriksson (1998).
Þróun og markaðsstaða lífræns landbúnaðar. BS-ritgerð. Háskóli Íslands, Viðskiptadeild, 60 bls.
Inga Hrönn Grétarsdóttir (1999).
Náttúran og við. Maður- menntun- matur og menning. B.Ed. ritgerð. Kennaraháskóli Íslands, 37 bls.
Birna Þorbergsdóttir, Elín Aradóttir, Eva Steinunn Sveinsdóttir, Hekla Gunnarsdóttir, Torfi Jóhannsson og Þorvarður Sigurbjörnsson (1999).
Lífræna lambið úr landi? – Möguleikar á Danmerkurmarkaði -. Samvinnuháskólinn á Bifröst, misserisverkefni, 30 bls. + fylgiskjöl.
Heiðrún Fríða Grétarsdóttir (2001).
Flæðiengjar – Möguleikar á nýtingu í lífrænum landbúnaði. Aðalritgerð (BS), Landbúnaðarháskólinn á Hvanneyri, 35 bls. + viðhengi.
Þröstur Aðalbjarnarson (2001).
Örveruvirkni í jarðvegi með tilliti til áburðarmeðferðar. Aðalritgerð (BS), Landbúnaðarháskólinn á Hvanneyri 33 bls.
|